Вясёлае свята беларускай прыпеўкі прайшло ў Ашмянскім раёне.

У межах штотыднёвай ініцыятывы «Кожная пятніца — роднае, сваё» аддзяленне падтрымкі актыўнага даўгалецця ва ўмовах дзеннага знаходжання ДУ «Тэрытарыяльны цэнтр сацыяльнага абслугоўвання насельніцтва Ашмянскага раёна» сумесна з філіялам «Сельскі клуб аг. Кальчуны» арганізавалі сапраўднае свята беларускай прыпеўкі. Гасцямі і ўдзельнікамі мерапрыемства сталі наведвальнікі аддзялення, а таксама ўдзельнікі аматарскага аб’яднання «60 +».

У праграме былі розныя конкурсы на тэму прыпевак. Удзельнікі спаборнічалі ў веданні народных радкоў, весела выконвалі вядомыя ўсім прыпеўкі. Некаторыя госці прадставілі жартоўныя творы ўласнага сачынення. Атмасфера панавала жывая і сяброўская, а песні гучалі ад шчырага сэрца.

Падобныя сустрэчы дапамагаюць захоўваць народныя традыцыі, даруюць добры настрой і даюць магчымасць старэйшаму пакаленню праявіць свае таленты. Мерапрыемства прайшло весела і цікава  — усе атрымалі зарад бадзёрасці і станоўчых эмоцый.